malayaalam.com

Malayalam BlogAggregate Classifieds YellowPage Politics News
നിഷ്‌പക്ഷം

റബ്ബറൈസ്ഡ് റോഡ് വ്യാപകമാക്കാവുന്ന ആശയം

കെ.കെ. രാമചന്ദ്രന്‍പിള്ള
റോഡ് ടാറ് ചെയ്യാന്‍ ഉപയോഗിക്കുന്ന ബിറ്റുമിന്‍ (ടാര്‍) ഉരുക്കിയശേഷം അതില്‍ രണ്ടുശതമാനം റബ്ബര്‍ ചേര്‍ക്കുന്നു (കറ രൂപത്തില്‍). റബ്ബര്‍ കറ ചേര്‍ക്കുമ്പോള്‍ ഉരുകിയ ബിറ്റുമിന് 140 മുതല്‍ 150 ഡിഗ്രി സെന്റിഗ്രേഡ് വരെ ചൂടുണ്ടായിരിക്കണം. റബ്ബര്‍ കറ ബിറ്റുമിനുമായി നന്നായി ഇളക്കി ചേര്‍ത്തതിനുശേഷം അരമണിക്കൂര്‍ കൂടി 140 മുതല്‍ 150 ഡിഗ്രി സെന്റിഗ്രേഡ് വരെ ചൂട് നിലനിര്‍ത്തേണ്ടതാണ്. ഇങ്ങനെ തയ്യാറാക്കുന്ന ബിറ്റുമിനും റബ്ബര്‍ കറയും ചേര്‍ത്ത മിശ്രിതമുപയോഗിച്ച് ടാറു ചെയ്ത റോഡുകള്‍ക്കാണ് റബ്ബറൈസ്ഡ് റോഡെന്നു പറയുന്നത്. റബ്ബറൈസ്ഡ് റോഡുകളുടെ മേന്മകള്‍ താഴെ പറയുന്നവയാണ്. 1. സാധാരണ ടാര്‍ റോഡുകളെക്കാള്‍ റബ്ബറൈസ്ഡ് റോഡുകള്‍ക്ക് ഇരുപതുശതമാനത്തോളം ചിലവ് കൂടുമെങ്കിലും സേവനകാലം റബ്ബറൈസ് ചെയ്യാത്ത റോഡുകളേക്കാള്‍ അന്‍പതു ശതമാനത്തോളം വര്‍ദ്ധിക്കും. 2. വേനല്‍ക്കാലത്ത് ടാര്‍ ഉരുകി റോഡില്‍ മുഴകള്‍ ഉണ്ടാകില്ല. 3. മഴക്കാലത്ത് റോഡില്‍ കുഴികള്‍ ഉണ്ടാകുന്നതിനെ ഒരു വലിയ പരിധിവരെ തടയും, 4. റബ്ബറൈസ്ഡ് റോഡുകള്‍ക്ക് ബലം കൂടുതല്‍ ഉള്ളതിനാല്‍ ഭാരം താങ്ങാനുള്ള ശേഷി കൂടിയിരിക്കും. 5. ഓടുന്ന വാഹനങ്ങളുടെ ടയറുകള്‍ തെന്നിമാറി അപകടങ്ങള്‍ ഉണ്ടാകുന്നതിനെ ഒരു പരിധിവരെ തടയും. 6. സാധാരണ റോഡുകളില്‍ കുഴികള്‍ ഉണ്ടാകുന്നതിനാല്‍ അത്തരം റോഡുകളില്‍ വണ്ടി ഓടിയ്ക്കുമ്പോള്‍ അടിയ്ക്കടി ഗിയര്‍ മാറ്റേണ്ടതായിവരും. എന്നാല്‍ റബ്ബറൈസ്ഡ് റോഡുകളില്‍ ഇങ്ങനെ അടിയ്ക്കടിയുള്ള ഗിയര്‍ മാറ്റം ഒരു പരിധിവരെ ഒഴിവാക്കാന്‍ കഴിയും. 7. റബ്ബറൈസ്ഡ് റോഡുകളില്‍ കുഴികള്‍ ഉണ്ടാകുന്നത് അപൂര്‍വ്വമായതിനാല്‍ വണ്ടികള്‍ ബ്രേക്ക് ചെയ്യേണ്ടിവരുന്ന സന്ദര്‍ഭങ്ങള്‍ റബ്ബറൈസ് ചെയ്യാത്ത റോഡുകളെ അപേക്ഷിച്ച് വളരെ കുറവായിരിക്കും. 8. റബ്ബറൈസ്ഡ് റോഡുകളില്‍ കൂടി ഓടുന്ന വാഹനങ്ങളുടെ തേയ്മാനം കുറവായിരിക്കുന്നതിനാല്‍ സംരക്ഷണ ചിലവ് കുറയുന്നു. 9. റബ്ബറൈസ്ഡ് റോഡുകളില്‍ കൂടി ഓടുന്ന വണ്ടികളുടെ ഇന്ധനചിലവ് റബ്ബറൈസ്ഡ് ചെയ്യാത്ത റോഡുകളില്‍ കൂടി ഓടുന്ന വണ്ടികളുടെ ഇന്ധനചിലവിനേക്കാള്‍ കുറവായിരിക്കും. (ഏതാണ്ട് പത്തുശതമാനം ഇന്ധനലാഭം ഉണ്ടാകുമെന്നാണ് കണക്കാക്കുന്നത്). 10. റബ്ബറൈസ് ചെയ്ത റോഡുകളുടെ ഉപരിതലം റബ്ബറൈസ് ചെയ്യാത്ത സാധാരണ ടാര്‍ റോഡുകളുടെ ഉപരിതലത്തേക്കാള്‍ വളരെ മെച്ചമായതിനാല്‍ വാഹനങ്ങളുടെ ഓട്ടം സുഗമവും സുരക്ഷിതവും ആയിരിക്കും. 11. വളരെ നല്ല പ്രതലമുള്ള റബ്ബറൈസ് ചെയ്ത റോഡുകളില്‍ കൂടി ഓടുന്ന വാഹനങ്ങളുടെ ടയറുകളുടെ തേയ്മാനം റബ്ബറൈസ് ചെയ്യാത്ത റോഡുകളില്‍ കൂടി ഓടുന്ന വാഹനങ്ങളുടെ ടയറുകളുടേതിനേക്കാള്‍ കുറവായിരിക്കും. ഇവിലെ ഉല്പാദിപ്പിക്കുന്ന സ്വാഭാവിക റബ്ബറില്‍, 65 ശതമാനത്തോളം ടയറുകളുടെ നിര്‍മ്മാണത്തിനും, റിട്രേഡിംഗിനും വേണ്ടിയാണിപ്പോള്‍ ഉപയോഗിച്ചുകൊണ്ടിരിക്കുന്നത്. അപ്പോള്‍ ദീര്‍ഘകാലാടിസ്ഥാനത്തില്‍ നോക്കുമ്പോള്‍ ടയറുകളുടെ തേയ്മാനം കുറഞ്ഞാല്‍ സ്വാഭാവിക റബ്ബറിന്റെ ഉപയോഗം കുറയാനാണ് സാധ്യത. (റോഡ് റബ്ബറൈസേഷനു വേണ്ടി വരുന്നത് രണ്ടുശതമാനം റബ്ബര്‍ മാത്രമാണ്). ചുരുക്കിപറഞ്ഞാല്‍ റബ്ബറിന്റെ ഉപയോഗം വര്‍ദ്ധിപ്പിച്ച് റബ്ബര്‍ കൃഷിക്കാരെ സഹായിക്കാനുള്ള ഒരു പദ്ധതി എന്നതിനേക്കാള്‍ ടയറുകളുടെ ആയുസ്സ് വര്‍ദ്ധിപ്പിച്ച് സ്വാഭാവിക റബ്ബറിന്റെ ഉപയോഗം കുറയ്ക്കാനുള്ള ഒരു പദ്ധതിയായിട്ടായിരിക്കും റബ്ബറൈസേഷന്‍ കൂടുതല്‍ പ്രയോജനപ്പെടുന്നത് എന്നു ചിന്തിക്കേണ്ടിയിരിക്കുന്നു. ഇതൊക്കെ വച്ചുനോക്കുമ്പോള്‍ നല്ല റോഡുകള്‍ ഉണ്ടാകാന്‍ റബ്ബറൈസേഷന്‍ സഹായിക്കുമെങ്കിലും റബ്ബര്‍ കൃഷിക്കാര്‍ക്ക് അവര്‍ ഉല്പാദിപ്പിക്കുന്ന റബ്ബറിനു നല്ല വിലകിട്ടാന്‍ റബ്ബറൈസേഷന്‍ സഹായിക്കുമോ എന്നത് പരിശോധിക്കേണ്ടതാണ്. ഇന്ത്യയില്‍ റോഡ് റബ്ബറൈസേഷനു വേണ്ടിയുള്ള പ്രവര്‍ത്തനങ്ങള്‍ തുടങ്ങിയത് 1973 ല്‍ ആണ്. എന്നാല്‍ കഴിഞ്ഞ നാല്പത്തി ഒന്നുവര്‍ഷങ്ങളില്‍ ഈ രംഗത്തുനേടി എടുക്കാന്‍ കഴിഞ്ഞ പുരോഗതി തികച്ചും നിസ്സാരമാണ്. പ്രമുഖ സാമൂഹ്യപ്രവര്‍ത്തകനും ഇന്‍ഫാമിന്റെ ചെയര്‍മാനുമായിരുന്ന ഫാ. മാത്യു വടക്കേമുറിയുടെ നേതൃത്വത്തില്‍ റബ്ബറൈസ് ചെയ്ത ഏതാണ്ട് പന്ത്രണ്ട് കിലോമീറ്റര്‍ ദൈര്‍ഘ്യം വരുന്ന പമ്പ ലിങ്ക് റോഡ് (മൂക്കന്‍പെട്ടി- തുലാപ്പള്ളി) ഒഴിച്ചാല്‍ ബാക്കിയെല്ലാം ഏതാനും കിലോമീറ്ററുകള്‍ വീതം പരീക്ഷണാടിസ്ഥാനത്തില്‍ റബ്ബറൈസ് ചെയ്ത ചില റോഡുകള്‍ മാത്രമാണ്. (റബ്ബര്‍ ബോര്‍ഡ് റിട്ടയേര്‍ഡ് ഉദ്യോഗസ്ഥനാണ് ലേഖകന്‍) *

വിഷയവിവരം


വലതുപക്ഷം
നിഷ്‌പക്ഷം
ഇടതുപക്ഷം
മതപക്ഷം
യുവപക്ഷം
ദളിതപക്ഷം
സ്ത്രീപക്ഷം